Il “Sureli 24 oris” di chiscj dîs cà al â publicât i dâts dai sondaçs relatîfs al gradiment dai nestris pulitics.
Al salte daûrman al voli cemût che sindics e presidents di provincis in t’un an e ân piardût sensibilmentri la fiduce dai propits citadins.
Nol è ce smaraveâsi, parcè che al è avonde normâl che cui che al â il dovê di ministrâ, a son di distrigâsi tra oblics e rognis, ae fin par fâ ben il so lavôr al scugnidi scontentâ ancje cualchidun.
Diviers al è il discôrs se invecit la int si vise che i soi rappresentants no ministrin, no decidin, a fasin dome pulitiche partitiche o piês a vendin la nestre tiare a Rome, a Milan e a Triest.
Inalore al ven pardabon di domandâsi cui che o vês sielgiût par rappresentâus e parcè che nol esist un pulitic furlan, che al sedi un, che al è braurôs di difindi la sô tiare, il sô popul, la sô lenghe, j soi valôrs…
Il pont al ê propit chist. No steit mai a dismenteâ che o sês stats voaltris a votaju, o sês voaltris che a continuâis a nudrî il sistema dai partîts che mai nol à fat e mai nol fasarà l’ interès dal Friûl ne dai Furlans.
No nus crodeis? Ben. Cjalaisi un tic atôr.
I pulitics plui navigâts par fâ strade since fadie e since spindi tancj beçs e ân bisugne di pojasi ae bandiere e ai francs di Berluscon, dal PD o de Leghe.
Chej plui scaltris e arriviscj o e ân l’ amicizie personâl dai boss locaj, tipo Collino e Saro, senò a pessein a deventâ ginars di Casini.
Mâl che us lêdi, o elejeis une romane che di chel che al sucêt ta Livence e Timâf, no j interesse propit nuje, a part lis monadis.
Se podopo o voleis colâ su ce che al vanze, o podês simpri rivolzius ai sicilians di Lombardo o ai democristians de prime republiche tant che De Mita.
I risultâts? Poben, isal cualchidun di vualtris che al’ â plui reddit, plui pension, plui servizis o mancul tassis?
Pussibil inalore che in Friûl, tiare autome e autonomiste, che o clamin adiriture “Patrie”, nol sedi nissun che al vedi voe di fâ alc (no disin di gnûf, ma amancul alc!) e di riscjâ in propit? Isal plui facil simiotâ chej altris opûr metisi sot paron cume che fasin ducj?
O l’ autonomie ise deventade une robe masse fadiôse pai Furlans, tant che i lavôrs che o scugnîs lassaj fâ aj extracomunitaris parcè che nissun j ûl plui fâ?
Nô, cume Front Furlan une alternative o podin dâle. Par cumò o sin dome une vôs, che o volin fâ deventâ simpri plui fuarte. Cul vuestri jutori, tal 2010 o podin cressi ancjemô e concretizâ tantis iniziativis.
Il Front, al infûr dai Furlans, nol â parons, e al â spazi par lis ideis e par il contribût di ducj. Cui che al à voe di sfuarçâ il cjâf e tirâsi su lis maniis al ê ben acèt.
Cussì, opûr spietâ che di autonomie a tachedin a cjacarâ j immigrats! Petsaitij!

Bon 2010.